آ رہے ہیں راستے پر آ رہے ہیں

آ رہے ہیں راستے پر آ رہے ہیں

وہ جنہیں برسوں سے ہم سمجھا رہے ہیں

ہیں بہت الجھے ہوئے الفت کے رستے

رفتہ رفتہ ہم انہیں سلجھا رہے ہیں

وہ ہمیں پر پھینکنے لگتے ہیں پتھر

آئنہ جن کو بھی ہم دکھلا رہے ہیں

کچھ پرانی حسرتوں کی لاش ہے یہ

ہم جسے کاندھے پہ لے کر جا رہے ہیں

لے رہی ہے زندگی کروٹ پہ کروٹ

تھپکیاں دے کر اسے بہلا رہے ہیں

آب الفت سے کوئی سیراب کر دے

خواب آنکھوں کے مرے مرجھا رہے ہیں

یاسمیںؔ بے ساختہ ان سے یہ کہہ دو

آپ ہی بس میرے دل کو بھا رہے ہیں

a rahe hain raste par a rahe hain

wo jinhen barson se ham samjha rahe hain

hain bahut uljhe hue ulfat ke raste

rafta rafta ham unhen suljha rahe hain

wo hamen par phenkne lagte hain patthar

aina jin ko bhi ham dikhla rahe hain

kuchh purani hasraton ki lash hai ye

ham jise kandhe pe le kar ja rahe hain

le rahi hai zindagi karwat pe karwat

thapakiyan de kar use bahla rahe hain

ab ulfat se koi sairab kar de

khwab ankhon ke mire murjha rahe hain

yasmin be sakhta un se ye kah do

ap hi bas mere dil ko bha rahe hain