علم و فن کے راز سر بستہ کو وا کرتا ہوا

علم و فن کے راز سر بستہ کو وا کرتا ہوا

وہ مجھے جب بھی ملا ہے ترجمہ کرتا ہوا

صرف احساس ندامت کے سوا کچھ بھی نہیں

اور ایسا بھی مگر وہ بارہا کرتا ہوا

جانے کن حیرانیوں میں ہے کہ اک مدت سے وہ

آئینہ در آئینہ در آئینہ کرتا ہوا

کیا قیامت خیز ہے اس کا سکوت ناز بھی

ایک عالم کو مگر وہ لب کشا کرتا ہوا

آگہی آسیب کی مانند رقصاں ہر طرف

میں کہ ہر دام شنیدن کو صدا کرتا ہوا

ایک میری جان کو اندیشے سو سو طرح کے

ایک وہ اپنے لیے سب کچھ روا کرتا ہوا

حال کیا پوچھو ہو منظرؔ کا وہ دیکھو اس طرف

ساری دنیا سے الگ اپنی ثنا کرتا ہوا

ilm-o-fan ke raz-e-sar basta ko wa karta hua

wo mujhe jab bhi mila hai tarjama karta hua

sirf-e-ehsas-e-nadamat ke siwa kuchh bhi nahin

aur aisa bhi magar wo barha karta hua

jane kin hairaniyon mein hai ke ik muddat se wo

aina dar aina dar aina karta hua

kya qayamat khez hai us ka sukut-e-naz bhi

ek alam ko magar wo lab kusha karta hua

agahi aseb ki manind-e-raqsan har taraf

main ke har dam-e-shanedan ko sada karta hua

ek meri jan ko andeshe sau sau tarah ke

ek wo apne liye sab kuchh rawa karta hua

hal kya puchho ho manzar ka wo dekho is taraf

sari duniya se alag apni sana karta hua