میں نے کب دعویٰ کیا تھا سر بسر باقی ہوں میں

میں نے کب دعویٰ کیا تھا سر بسر باقی ہوں میں

پیش خدمت ہوں تمہارے جس قدر باقی ہوں میں

میں بہت سا جیسے ضائع ہو چکا ہوں جا بہ جا

ہاتھ سے محسوس کرتا ہوں کدھر باقی ہوں میں

ڈھونڈتے ہیں اب جہاں میرا نشاں تک بھی نہیں

اس طرف بھی دیکھ لینا تھا جدھر باقی ہوں میں

میری تفصیلات میں جانے کا موقع اب کہاں

اب تو آساں ہے سمجھنا مختصر باقی ہوں میں

دن چڑھے ہونا نہ ہونا ایک سا رہ جائے گا

یہ بھی کیا کم ہے کہ اب سے رات بھر باقی ہوں میں

خرچ سارا ہو چکا ہوں اور دنیا میں کہیں

کچھ اگر ہوں بھی تو خود سے بے خبر باقی ہوں میں

میں کسی کام آ بھی سکتا ہوں اگر سمجھے کوئی

آج بھی خس خانۂ دل میں شرر باقی ہوں میں

میں اگر باقی نہیں ہوں تو بھی ہے کس کو غرض

اور ہے پروا یہاں کس کو اگر باقی ہوں میں

کچھ بھی ہو بے سود ہے مجھ سے سفر کرنا ظفرؔ

جو کہیں جاتی نہیں وہ رہگزر باقی ہوں میں

main ne kab daawa kiya tha sar basar baqi hun main

pesh-e-khidmat hun tumhare jis qadar baqi hun main

main bahut sa jaise zae ho chuka hun ja ba ja

hath se mahsus karta hun kidhar baqi hun main

dhundte hain ab jahan mera nishan tak bhi nahin

is taraf bhi dekh lena tha jidhar baqi hun main

meri tafsilat mein jane ka mauqaa ab kahan

ab to asan hai samajhna mukhtasar baqi hun main

din charhe hona na hona ek sa rah jaega

ye bhi kya kam hai ke ab se rat bhar baqi hun main

kharch sara ho chuka hun aur duniya mein kahin

kuchh agar hun bhi to khud se be khabar baqi hun main

main kisi kam a bhi sakta hun agar samjhe koi

aj bhi khas khana-e-dil mein sharar baqi hun main

main agar baqi nahin hun tu bhi hai kis ko gharaz

aur hai parwa yahan kis ko agar baqi hun main

kuchh bhi ho be sud hai mujh se safar karna zafar

jo kahin jati nahin wo rahguzar baqi hun main