کیا بتاؤں کیسا خود کو در بدر میں نے کیا

کیا بتاؤں کیسا خود کو در بدر میں نے کیا

عمر بھر کس کس کے حصے کا سفر میں نے کیا

تو تو نفرت بھی نہ کر پائے گا اس شدت کے ساتھ

جس بلا کا پیار تجھ سے بے خبر میں نے کیا

کیسے بچوں کو بتاؤں راستوں کے پیچ و خم

زندگی بھر تو کتابوں کا سفر میں نے کیا

کس کو فرصت تھی کہ بتلاتا تجھے اتنی سی بات

خود سے کیا برتاؤ تجھ سے چھوٹ کر میں نے کیا

چند جذباتی سے رشتوں کے بچانے کو وسیمؔ

کیسا کیسا جبر اپنے آپ پر میں نے کیا

kya bataun kaisa khud ko dar badar main ne kiya

umr bhar kis kis ke hisse ka safar main ne kiya

tu to nafrat bhi na kar paega is shiddat ke sath

jis bala ka pyar tujh se be khabar main ne kiya

kaise bachchon ko bataun raston ke pech-o-kham

zindagi bhar to kitabon ka safar main ne kiya

kis ko fursat thi ke batlata tujhe itni si bat

khud se kya bartao tujh se chhut kar main ne kiya

chand jazbati se rishton ke bachane ko wasim

kaisa kaisa jabr apne ap par main ne kiya