ہم اپنے آپ کو اک مسئلہ بنا نہ سکے

ہم اپنے آپ کو اک مسئلہ بنا نہ سکے

اسی لئے تو کسی کی نظر میں آ نہ سکے

ہم آنسوؤں کی طرح واسطے نبھا نہ سکے

رہے جن آنکھوں میں ان میں ہی گھر بنا نہ سکے

پھر آندھیوں نے سکھایا وہاں سفر کا ہنر

جہاں چراغ ہمیں راستہ دکھا نہ سکے

جو پیش پیش تھے بستی بچانے والوں میں

لگی جب آگ تو اپنا بھی گھر بچا نہ سکے

مرے خدا کسی ایسی جگہ اسے رکھنا

جہاں کوئی مرے بارے میں کچھ بتا نہ سکے

تمام عمر کی کوشش کا بس یہی حاصل

کسی کو اپنے مطابق کوئی بنا نہ سکے

تسلیوں پہ بہت دن جیا نہیں جاتا

کچھ ایسا ہو کے ترا اعتبار آ نہ سکے

ham apne ap ko ik masala bana na sake

isi liye to kisi ki nazar mein a na sake

ham ansuon ki tarah waste nibha na sake

rahe jin ankhon mein un mein hi ghar bana na sake

phir andhiyon ne sikhaya wahan safar ka hunar

jahan charagh hamen rasta dikha na sake

jo pesh pesh the basti bachane walon mein

lagi jab ag to apna bhi ghar bacha na sake

mire khuda kisi aisi jagah use rakhna

jahan koi mire bare mein kuchh bata na sake

tamam umr ki koshish ka bas yahi hasil

kisi ko apne mutabiq koi bana na sake

tasalliyon pe bahut din jiya nahin jata

kuchh aisa ho ke tira etibar a na sake