تمہاری راہ میں مٹی کے گھر نہیں آتے

تمہاری راہ میں مٹی کے گھر نہیں آتے

اسی لئے تو تمہیں ہم نظر نہیں آتے

محبتوں کے دنوں کی یہی خرابی ہے

یہ روٹھ جائیں تو پھر لوٹ کر نہیں آتے

جنہیں سلیقہ ہے تہذیب غم سمجھنے کا

انہیں کے رونے میں آنسو نظر نہیں آتے

خوشی کی آنکھ میں آنسو کی بھی جگہ رکھنا

برے زمانے کبھی پوچھ کر نہیں آتے

بساط عشق پہ بڑھنا کسے نہیں آتا

یہ اور بات کہ بچنے کے گھر نہیں آتے

وسیمؔ ذہن بناتے ہیں تو وہی اخبار

جو لے کے ایک بھی اچھی خبر نہیں آتے

tumhari rah mein mitti ke ghar nahin ate

isi liye to tumhen ham nazar nahin ate

mohabbaton ke dinon ki yahi kharabi hai

ye ruth jaen to phir laut kar nahin ate

jinhen saliqa hai tahzib-e-gham samajhne ka

unhen ke rone mein ansu nazar nahin ate

khushi ki ankh mein ansu ki bhi jagah rakhna

bure zamane kabhi puchh kar nahin ate

bisat-e-ishq pe barhna kise nahin ata

ye aur bat ke bachne ke ghar nahin ate

wasim zehn banate hain to wahi akhbar

jo le ke ek bhi achchhi khabar nahin ate