بھلا غموں سے کہاں ہار جانے والے تھے

بھلا غموں سے کہاں ہار جانے والے تھے

ہم آنسوؤں کی طرح مسکرانے والے تھے

ہمیں نے کر دیا اعلان گمرہی ورنہ

ہمارے پیچھے بہت لوگ آنے والے تھے

انہیں تو خاک میں ملنا ہی تھا کہ میرے تھے

یہ اشک کون سے اونچے گھرانے والے تھے

انہیں قریب نہ ہونے دیا کبھی میں نے

جو دوستی میں حدیں بھول جانے والے تھے

میں جن کو جان کے پہچان بھی نہیں سکتا

کچھ ایسے لوگ مرا گھر جلانے والے تھے

ہمارا المیہ یہ تھا کہ ہم سفر بھی ہمیں

وہی ملے جو بہت یاد آنے والے تھے

وسیمؔ کیسی تعلق کی راہ تھی جس میں

وہی ملے جو بہت دل دکھانے والے تھے

bhala ghamon se kahan har jane wale the

ham ansuon ki tarah muskurane wale the

hamen ne kar diya elan gumrahi warna

hamare pichhe bahut log ane wale the

unhen to khak mein milna hi tha ke mere the

ye ashk kaun se unche gharane wale the

unhen qarib na hone diya kabhi main ne

jo dosti mein haden bhul jane wale the

main jin ko jan ke pahchan bhi nahin sakta

kuchh aise log mira ghar jalane wale the

hamara alamiyya ye tha ke ham safar bhi hamen

wahi mile jo bahut yad ane wale the

wasim kaisi taalluq ki rah thi jis mein

wahi mile jo bahut dil dikhane wale the