وہ میرے گھر نہیں آتا میں اس کے گھر نہیں جاتا

وہ میرے گھر نہیں آتا میں اس کے گھر نہیں جاتا

مگر ان احتیاطوں سے تعلق مر نہیں جاتا

برے اچھے ہوں جیسے بھی ہوں سب رشتے یہیں کے ہیں

کسی کو ساتھ دنیا سے کوئی لے کر نہیں جاتا

گھروں کی تربیت کیا آ گئی ٹی وی کے ہاتھوں میں

کوئی بچہ اب اپنے باپ کے اوپر نہیں جاتا

کھلے تھے شہر میں سو در مگر اک حد کے اندر ہی

کہاں جاتا اگر میں لوٹ کے پھر گھر نہیں جاتا

محبت کے یہ آنسو ہیں انہیں آنکھوں میں رہنے دو

شریفوں کے گھروں کا مسئلہ باہر نہیں جاتا

وسیمؔ اس سے کہو دنیا بہت محدود ہے میری

کسی در کا جو ہو جائے وہ پھر در در نہیں جاتا

wo mere ghar nahin ata mein us ke ghar nahin jata

magar in ehtiyaton se taalluq mar nahin jata

bure achchhe hun jaise bhi hun sab rishte yahin ke hain

kisi ko sath duniya se koi le kar nahin jata

gharon ki tarbiyat kya a gai ti wi ke hathon mein

koi bachcha ab apne bap ke upar nahin jata

khule the shahr mein so dar magar ik had ke andar hi

kahan jata agar main laut ke phir ghar nahin jata

mohabbat ke ye ansu hain unhen ankhon mein rahne do

sharifon ke gharon ka masala bahar nahin jata

wasim us se kaho duniya bahut mahdud hai meri

kisi dar ka jo ho jae wo phir dar dar nahin jata