موسموں کے تغیر کو بھانپا نہیں چھتریاں کھول دیں

موسموں کے تغیر کو بھانپا نہیں چھتریاں کھول دیں

زخم بھرنے سے پہلے کسی نے مری پٹیاں کھول دیں

ہم مچھیروں سے پوچھو سمندر نہیں ہے یہ عفریت ہے

تم نے کیا سوچ کر ساحلوں سے بندھی کشتیاں کھول دیں

اس نے وعدوں کے پربت سے لٹکے ہوؤں کو سہارا دیا

اس کی آواز پر کوہ پیماؤں نے رسیاں کھول دیں

دشت غربت میں میں اور مرا یار شب زاد باہم ملے

یار کے پاس جو کچھ بھی تھا یار نے گٹھڑیاں کھول دیں

کچھ برس تو تری یاد کی ریل دل سے گزرتی رہی

اور پھر میں نے تھک ہار کے ایک دن پٹریاں کھول دیں

اس نے صحراؤں کی سیر کرتے ہوئے اک شجر کے تلے

اپنی آنکھوں سے عینک اتاری کہ دو ہرنیاں کھول دیں

آج ہم کر چکے عہد ترک سخن پر رقم دستخط

آج ہم نے نئے شاعروں کے لیے بھرتیاں کھول دیں

mausamon ke taghayyur ko bhanpa nahin chhatriyan khol den

zakhm bharne se pahle kisi ne miri pattiyan khol den

ham machheron se puchho samundar nahin hai ye ifrit hai

tum ne kiya soch kar sahilon se bandhi kashtiyan khol den

us ne waadon ke parbat se latke huon ko sahara diya

us ki awaz par koh paimaon ne rassiyan khol den

dasht-e-ghurbat mein main aur mira yar shab zad baham mile

yar ke pas jo kuchh bhi tha yar ne gathrayan khol den

kuchh baras to tiri yad ki rel dil se guzarti rahi

aur phir main ne thak har ke ek din patriyan khol den

us ne sahraon ki sair karte hue ik shajar ke tale

apni ankhon se ainak utari ke do harniyan khol den

aj ham kar chuke ahd-e-tark-e-sukhan par raqam dastkhat

aj ham ne nae shayaron ke liye bhartiyan khol den