میں نے یہ کب کہا ہے کہ وہ مجھ کو تنہا نہیں چھوڑتا

میں نے یہ کب کہا ہے کہ وہ مجھ کو تنہا نہیں چھوڑتا

چھوڑتا ہے مگر ایک دن سے زیادہ نہیں چھوڑتا

کون صحراؤں کی پیاس ہے ان مکانوں کی بنیاد میں

بارشوں سے اگر بچ بھی جائیں تو دریا نہیں چھوڑتا

دور امید کی کھڑکیوں سے کوئی جھانکتا ہے یہاں

اور میرے گلی چھوڑنے تک دریچہ نہیں چھوڑتا

میں جسے چھوڑ کر تم سے چھپ کر ملا ہوں اگر آج وہ

دیکھ لیتا تو شاید وہ دونوں کو زندہ نہیں چھوڑتا

کون و امکان میں دو طرح کے ہی تو شعبدہ‌ باز ہیں

ایک پردہ گراتا ہے اور ایک پردہ نہیں چھوڑتا

سچ کہوں میری قربت تو خود اس کی سانسوں کا وردان ہے

میں جسے چھوڑ دیتا ہوں اس کو قبیلہ نہیں چھوڑتا

طے شدہ وقت پر وہ پہنچ جاتا ہے پیار کرنے وصول

جس طرح اپنا قرضہ کبھی کوئی بنیا نہیں چھوڑتا

پہلے مجھ پر بہت بھونکتا ہے کہ میں اجنبی ہوں کوئی

اور اگر گھر سے جانے کا بولوں تو کرتا نہیں چھوڑتا

لوگ کہتے ہیں تہذیب حافیؔ اسے چھوڑ کر ٹھیک ہے

ہجر اتنا ہی آسان ہوتا تو تونسہ نہیں چھوڑتا

main ne ye kab kaha hai ke wo mujh ko tanha nahin chhorta

chhorta hai magar ek din se ziyada nahin chhorta

kaun sahraon ki pyas hai in makanon ki buniyad mein

barishon se agar bach bhi jaen to dariya nahin chhorta

dur ummid ki khirkiyon se koi jhankta hai yahan

aur mere gali chhorne tak daricha nahin chhorta

main jise chhor kar tum se chhup kar mila hun agar aj wo

dekh leta to shayad wo donon ko zinda nahin chhorta

kaun-o-imkan mein do tarah ke hi to shobada baz hain

ek parda girata hai aur ek parda nahin chhorta

sach kahun meri qurbat to khud us ki sanson ka wirdan hai

main jise chhor deta hun us ko qabila nahin chhorta

tai shuda waqt par wo pahunch jata hai pyar karne wusul

jis tarah apna qarza kabhi koi baniya nahin chhorta

pahle mujh par bahut bhaunkta hai ke main ajnabi hun koi

aur agar ghar se jane ka bolun to karta nahin chhorta

log kahte hain tahzib hafi use chhor kar thik hai

hijr itna hi asan hota to tonsah nahin chhorta