چیختے ہیں در و دیوار نہیں ہوتا میں

چیختے ہیں در و دیوار نہیں ہوتا میں

آنکھ کھلنے پہ بھی بیدار نہیں ہوتا میں

خواب کرنا ہو سفر کرنا ہو یا رونا ہو

مجھ میں خوبی ہے بیزار نہیں ہوتا میں

اب بھلا اپنے لیے بننا سنورنا کیسا

خود سے ملنا ہو تو تیار نہیں ہوتا میں

کون آئے گا بھلا میری عیادت کے لئے

بس اسی خوف سے بیمار نہیں ہوتا میں

منزل عشق پہ نکلا تو کہا رستے نے

ہر کسی کے لئے ہموار نہیں ہوتا میں

تیری تصویر سے تسکین نہیں ہوتی مجھے

تیری آواز سے سرشار نہیں ہوتا میں

لوگ کہتے ہیں میں بارش کی طرح ہوں حافیؔ

اکثر اوقات لگاتار نہیں ہوتا میں

chikhte hain dar-o-diwar nahin hota main

ankh khulne pe bhi bedar nahin hota main

khwab karna ho safar karna ho ya rona ho

mujh mein khubi hai bezar nahin hota main

ab bhala apne liye banna sanwarna kaisa

khud se milna ho to tayyar nahin hota main

kaun aega bhala meri ayadat ke liye

bas isi khauf se bimar nahin hota main

manzil-e-ishq pe nikla to kaha raste ne

har kisi ke liye hamwar nahin hota main

teri taswir se taskin nahin hoti mujhe

teri awaz se sarshar nahin hota main

log kahte hain main barish ki tarah hun hafi

aksar auqat lagatar nahin hota main