جانے والے سے رابطہ رہ جائے

جانے والے سے رابطہ رہ جائے

گھر کی دیوار پر دیا رہ جائے

اک نظر جو بھی دیکھ لے تجھ کو

وہ ترے خواب دیکھتا رہ جائے

اتنی گرہیں لگی ہیں اس دل پر

کوئی کھولے تو کھولتا رہ جائے

کوئی کمرے میں آگ تاپتا ہو

کوئی بارش میں بھیگتا رہ جائے

نیند ایسی کہ رات کم پڑ جائے

خواب ایسا کہ منہ کھلا رہ جائے

جھیل سیف الملوک پر جاؤں

اور کمرے میں کیمرہ رہ جائے

jane wale se rabta rah jae

ghar ki diwar par diya rah jae

ik nazar jo bhi dekh le tujh ko

wo tire khwab dekhta rah jae

itni girhen lagi hain is dil par

koi khole to kholta rah jae

koi kamre mein ag tapta ho

koi barish mein bhigta rah jae

nind aisi ke rat kam par jae

khwab aisa ke munh khula rah jae

jhil saif almuluk par jaun

aur kamre mein kaimra rah jae