اس ایک ڈر سے خواب دیکھتا نہیں

اس ایک ڈر سے خواب دیکھتا نہیں

میں جو بھی دیکھتا ہوں بھولتا نہیں

کسی منڈیر پر کوئی دیا جلا

پھر اس کے بعد کیا ہوا پتا نہیں

ابھی سے ہاتھ کانپنے لگے مرے

ابھی تو میں نے وہ بدن چھوا نہیں

میں آ رہا تھا راستے میں پھول تھے

میں جا رہا ہوں کوئی روکتا نہیں

تری طرف چلے تو عمر کٹ گئی

یہ اور بات راستہ کٹا نہیں

میں راہ سے بھٹک گیا تو کیا ہوا

چراغ میرے ہاتھ میں تو تھا نہیں

میں ان دنوں ہوں خود سے اتنا بے خبر

میں مر چکا ہوں اور مجھے پتا نہیں

اس اژدہے کی آنکھ پوچھتی رہی

کسی کو خوف آ رہا ہے یا نہیں

یہ عشق بھی عجب کہ ایک شخص سے

مجھے لگا کہ ہو گیا ہوا نہیں

خدا کرے وہ پیڑ خیریت سے ہو

کئی دنوں سے اس کا رابطہ نہیں

us ek dar se khwab dekhta nahin

main jo bhi dekhta hun bhulta nahin

kisi munder par koi diya jala

phir is ke baad kya hua pata nahin

abhi se hath kanpne lage mire

abhi to main ne wo badan chhua nahin

main a raha tha raste mein phul the

main ja raha hun koi rokta nahin

tiri taraf chale to umr kat gai

ye aur bat rasta kata nahin

main rah se bhatak gaya to kya hua

charagh mere hath mein to tha nahin

main in dinon hun khud se itna be khabar

main mar chuka hun aur mujhe pata nahin

is azhdahe ki ankh puchhti rahi

kisi ko khauf a raha hai ya nahin

ye ishq bhi ajab ke ek shakhs se

mujhe laga ke ho gaya hua nahin

khuda kare wo per khairiyat se ho

kai dinon se us ka rabta nahin