اک ترا ہجر دائمی ہے مجھے

اک ترا ہجر دائمی ہے مجھے

ورنہ ہر چیز عارضی ہے مجھے

ایک سایہ مرے تعاقب میں

ایک آواز ڈھونڈتی ہے مجھے

میری آنکھوں پہ دو مقدس ہاتھ

یہ اندھیرا بھی روشنی ہے مجھے

میں سخن میں ہوں اس جگہ کہ جہاں

سانس لینا بھی شاعری ہے مجھے

ان پرندوں سے بولنا سیکھا

پیڑ سے خامشی ملی ہے مجھے

میں اسے کب کا بھول بھال چکا

زندگی ہے کہ رو رہی ہے مجھے

میں کہ کاغذ کی ایک کشتی ہوں

پہلی بارش ہی آخری ہے مجھے

ik tira hijr daimi hai mujhe

warna har chiz arzi hai mujhe

ek saya mire taaqub mein

ek awaz dhundti hai mujhe

meri ankhon pe do muqaddas hath

ye andhera bhi raushni hai mujhe

main sukhan mein hun is jagah ke jahan

sans lena bhi shayari hai mujhe

in parindon se bolna sikha

per se khamushi mili hai mujhe

main use kab ka bhul bhal chuka

zindagi hai ke ro rahi hai mujhe

main ke kaghaz ki ek kashti hun

pahli barish hi akhiri hai mujhe