تم نے یہ کیا ستم کیا ضبط سے کام لے لیا

تم نے یہ کیا ستم کیا ضبط سے کام لے لیا

ترک وفا کے بعد بھی میرا سلام لے لیا

رند خراب نوش کی بے ادبی تو دیکھیے

نیت مے کشی نہ کی ہاتھ میں جام لے لیا

ہائے وہ پیکر ہوس ہائے وہ خوگر قفس

بیچ کے جس نے آشیاں حلقۂ دام لے لیا

بادہ کشان عشق کو کچھ تو ملا پئے سکوں

حسن سحر نہ لے سکے جلوۂ شام لے لیا

نامۂ شوق پڑھ کے وہ کھو گئے یک بیک شکیلؔ

منہ سے تو کچھ نہ کہہ سکے دل سے پیام لے لیا

tum ne ye kya sitam kiya zabt se kam le liya

tark-e-wafa ke baad bhi mera salam le liya

rind-e-kharab nosh ki be adabi to dekhiye

niyyat-e-mai kashi na ki hath mein jam le liya

hae wo paikar-e-hawas hae wo khugar-e-qafas

bech ke jis ne ashiyan halqa-e-dam le liya

bada kashin-e-ishq ko kuchh to mila piye sukun

husn-e-sahar na le sake jalwa-e-sham le liya

nama-e-shauq parh ke wo kho gae yak bayak shakil

munh se to kuchh na kah sake dil se payam le liya