ابھی دیکھی کہاں ہیں آپ نے سب خوبیاں میری

ابھی دیکھی کہاں ہیں آپ نے سب خوبیاں میری

نگاہیں ڈھونڈھتی ہیں آپ کی بس خامیاں میری

مرا کردار دنیاں میں شہادت سے منور ہے

نظر آئیں فلک پر سب کو روشن سرخیاں میری

وہاں برسوں تلک پھولوں کی کھیتی ہوتی رہتی ہے

برس جاتی ہیں جن خطوں پہ جا کر بدلیاں میری

میں ہر نیکی کو اپنے دشمنوں میں بانٹ دیتی ہوں

ثمر آور رہا کرتی ہیں اس سے نیکیاں میری

زمانہ چاہے جو سمجھے انا کے ساتھ زندہ ہوں

تمہیں بھی جیت لے گی ایک دن یے خوبیاں میری

کسی بھی معرکے پر اب تلک ہاری نہیں ہوں میں

مرا زیور رہا ہے دوستوں خودداریاں میری

جسے تم راکھ سمجھے ہو ابھی تک آگ ہے اس میں

کریدو مت جلا دے گی تمہیں چنگاریاں میری

سبینؔ اکثر میں دسترخواں سے اٹھ جاتی ہوں بن کھائے

کسی بھوکے کے کام آ جائیں شاید روٹیاں میری

abhi dekhi kahan hain ap ne sab khubiyan meri

nigahen dhundhti hain ap ki bas khamiyan meri

mira kirdar daniyan mein shahadat se munawwar hai

nazar aen falak par sab ko raushan surkhiyan meri

wahan barson talak phulon ki kheti hoti rahti hai

baras jati hain jin khitton pe ja kar badliyan meri

main har neki ko apne dushmanon mein bant deti hun

samar awar raha karti hain us se nekiyan meri

zamana chahe jo samjhe ana ke sath zinda hun

tumhen bhi jit legi ek din ye khubiyan meri

kisi bhi marke par ab talak hari nahin hun main

mira zewar raha hai doston khuddariyan meri

jise tum rakh samjhe ho abhi tak ag hai is mein

kuredo mat jala degi tumhen chingariyan meri

sabyun aksar main dastarkhwan se uth jati hun ban khae

kisi bhuke ke kam a jaen shayad rotiyan meri