اک اک قدم فریب تمنا سے بچ کے چل

اک اک قدم فریب تمنا سے بچ کے چل

دنیا کی آرزو ہے تو دنیا سے بچ کے چل

خود ڈھونڈ لے گا تجھ کو ترا منفرد مقام

راہ طلب میں نقش کف پا سے بچ کے چل

باقی ہے میرے دل میں ابھی عظمت وجود

قطرے سے کہہ رہا ہوں کہ دریا سے بچ کے چل

ملتی نہیں ہے راہ سکوں خوف و یاس میں

گلشن کی جستجو ہے تو صحرا سے بچ کے چل

منہ جادۂ وفا سے نہ موڑ اے وفا شعار

لیکن حدود چشم تماشا سے بچ کے چل

کتنی حسیں ہیں ان کے ستم کی مسرتیں

شکر کرم کی زحمت بے جا سے بچ کے چل

لمحے اداس اداس فضائیں گھٹی گھٹی

دنیا اگر یہی ہے تو دنیا سے بچ کے چل

اپنے ادب پہ ناز ہے تجھ کو اگر شکیلؔ

مغرب زدہ ادیب کی دنیا سے بچ کے چل

ik ik qadam fareb-e-tamanna se bach ke chal

duniya ki arzu hai to duniya se bach ke chal

khud dhund lega tujh ko tira munfarid maqam

rah-e-talab mein naqsh-e-kaf-e-pa se bach ke chal

baqi hai mere dil mein abhi azmat wajud

qatre se kah raha hun ke dariya se bach ke chal

milti nahin hai rah-e-sukun khauf-o-yas mein

gulshan ki justuju hai to sahra se bach ke chal

munh jada-e-wafa se na mor ai wafa shiar

lekin hudud-e-chashm-e-tamasha se bach ke chal

kitni hasin hain un ke sitam ki masarraten

shukr-e-karam ki zahmat-e-be ja se bach ke chal

lamhe udas udas fazaen ghati ghati

duniya agar yahi hai to duniya se bach ke chal

apne adab pe naz hai tujh ko agar shakil

maghrib zada adib ki duniya se bach ke chal