بہار آئی کسی کا سامنا کرنے کا وقت آیا

بہار آئی کسی کا سامنا کرنے کا وقت آیا

سنبھل اے دل کہ اظہار وفا کرنے کا وقت آیا

انہیں آمادۂ مہر و وفا کرنے کا وقت آیا

بڑی مدت میں عرض مدعا کرنے کا وقت آیا

رواں ہیں اپنے مرکز کی طرف آسودہ امیدیں

ہجوم یاس کو دل سے جدا کرنے کا وقت آیا

پھر اک گم کردہ راہ زندگی کو مل گئی منزل

سجود شکر بے پایاں ادا کرنے کا وقت آیا

کبھی دوری تھی لیکن اب خیال خوف دوری ہے

فغاں کی ساعتیں گزریں دعا کرنے کا وقت آیا

کہاں تک ختم رہتا درمیاں پر دل کا افسانہ

بالآخر درمیاں سے ابتدا کرنے کا وقت آیا

ہر اک جرم محبت اس نگاہ لطف کے صدقے

نوید عافیت لے کر خطا کرنے کا وقت آیا

نگاہ و دل سے اب تفسیر و شرح آرزو ہوگی

زبان و لب سے ترک التجا کرنے کا وقت آیا

وہ آتے ہیں شکیلؔ اب اپنے دل سے ہاتھ دھو بیٹھو

نگاہ ناز کی قیمت ادا کرنے کا وقت آیا

bahar ai kisi ka samna karne ka waqt aya

sambhal ai dil ke izhar-e-wafa karne ka waqt aya

unhen amada-e-mehr-o-wafa karne ka waqt aya

bari muddat mein arz-e-muddaa karne ka waqt aya

rawan hain apne markaz ki taraf asuda ummiden

hujum-e-yas ko dil se juda karne ka waqt aya

phir ik gum karda rah-e-zindagi ko mil gai manzil

sujud-e-shukr be payan ada karne ka waqt aya

kabhi duri thi lekin ab khayal-e-khauf-e-duri hai

fughan ki saaten guzren dua karne ka waqt aya

kahan tak khatm rahta darmiyan par dil ka afsana

bilakhir darmiyan se ibtida karne ka waqt aya

har ik jurm-e-mohabbat us nigah-e-lutf ke sadqe

nawed-e-afiyat le kar khata karne ka waqt aya

nigah-o-dil se ab tafsir-o-sharh-e-arzu hogi

zaban-o-lab se tark-e-iltija karne ka waqt aya

wo ate hain shakil ab apne dil se hath dho baitho

nigah-e-naz ki qimat ada karne ka waqt aya