وہ یوں کھو کے مجھے پایا کریں گے

وہ یوں کھو کے مجھے پایا کریں گے

مرا افسانہ دہرایا کریں گے

ستم اپنے جو یاد آیا کریں گے

تو دل ہی دل میں پچھتایا کریں گے

غرور حسن کو باطل سمجھ کر

سراپا عشق بن جایا کریں گے

نہ ہوگی تاب ضبط غم جب ان کو

یقیناً اشک بھر لایا کریں گے

قیامت ہوں گی نازک دل کی آہیں

ہر اک ذرے کو تڑپایا کریں گے

فلک ماتم کرے گا بے کسی پر

مہ و انجم ترس کھایا کریں گے

مجھے ہر گام پر ٹھکرانے والے

مجھی پر ناز فرمایا کریں گے

نہ ہوگی جب سکوں کی کوئی صورت

کچھ اپنے دل کو سمجھایا کریں گے

ہر اک تدبیر جب ناکام ہوگی

تو مجھ کو رو بہ رو پایا کریں گے

نگاہوں سے ملا کر وہ نگاہیں

یکایک رخ بدل جایا کریں گے

وہی ناز و ادا کی شکل ہوگی

اسی صورت سے شرمایا کریں گے

میں کہتا ہی رہوں گا قصۂ غم

وہ سنتے سنتے سو جایا کریں گے

مگر جب ہوگا عالم عالم خواب

نہ پا کر مجھ کو گھبرایا کریں گے

شکیلؔ اپنے لئے لمحات فرصت

پیام نو بہ نو لایا کریں گے

wo yun kho ke mujhe paya karenge

mira afsana dohraya karenge

sitam apne jo yad aya karenge

to dil hi dil mein pachhtaya karenge

ghurur-e-husn ko batil samajh kar

sarapa ishq ban jaya karenge

na hogi tab-e-zabt-e-gham jab un ko

yaqinan ashk bhar laya karenge

qayamat hongi nazuk dil ki ahen

har ik zarre ko tarpaya karenge

falak matam karega be kisi par

mah-o-anjum taras khaya karenge

mujhe har gam par thukrane wale

mujhi par naz farmaya karenge

na hogi jab sukun ki koi surat

kuchh apne dil ko samjhaya karenge

har ik tadbir jab nakam hogi

tu mujh ko ru ba ro paya karenge

nigahon se mila kar wo nigahen

yakayak rukh badal jaya karenge

wahi naz-o-ada ki shakl hogi

isi surat se sharmaya karenge

main kahta hi rahunga qissa-e-gham

wo sunte sunte so jaya karenge

magar jab hoga alam alam-e-khwab

na pa kar mujh ko ghabraya karenge

shakil apne liye lamhat-e-fursat

payam-e-nau ba nau laya karenge