چاندنی میں رخ زیبا نہیں دیکھا جاتا

چاندنی میں رخ زیبا نہیں دیکھا جاتا

ماہ و خورشید کو یکجا نہیں دیکھا جاتا

یوں تو ان آنکھوں سے کیا کیا نہیں دیکھا جاتا

ہاں مگر اپنا ہی جلوہ نہیں دیکھا جاتا

دیدہ و دل کی تباہی مجھے منظور مگر

ان کا اترا ہوا چہرہ نہیں دیکھا جاتا

ضبط غم ہاں وہی اشکوں کا تلاطم اک بار

اب تو سوکھا ہوا دریا نہیں دیکھا جاتا

زندگی آ تجھے قاتل کے حوالے کر دوں

مجھ سے اب خون تمنا نہیں دیکھا جاتا

اب تو جھوٹی بھی تسلی بسر و چشم قبول

دل کا رہ رہ کے تڑپنا نہیں دیکھا جاتا

chandni mein rukh-e-zeba nahin dekha jata

mah-o-khurshid ko yakja nahin dekha jata

yun to in ankhon se kya kya nahin dekha jata

han magar apna hi jalwa nahin dekha jata

dida-o-dil ki tabahi mujhe manzur magar

un ka utra hua chehra nahin dekha jata

zabt-e-gham han wahi ashkon ka talatum ik bar

ab to sukha hua dariya nahin dekha jata

zindagi a tujhe qatil ke hawale kar dun

mujh se ab khun-e-tamanna nahin dekha jata

ab to jhuti bhi tasalli basar-o-chashm-e-qubul

dil ka rah rah ke tarapna nahin dekha jata