زندگی ان کی چاہ میں گزری

زندگی ان کی چاہ میں گزری

مستقل درد و آہ میں گزری

رحمتوں سے نباہ میں گزری

عمر ساری گناہ میں گزری

ہائے وہ زندگی کی اک ساعت

جو تری بارگاہ میں گزری

سب کی نظروں میں سر بلند رہے

جب تک ان کی نگاہ میں گزری

میں وہ اک رہرو محبت ہوں

جس کی منزل بھی راہ میں گزری

اک خوشی ہم نے دل میں چاہی تھی

وہ بھی غم کی پناہ میں گزری

زندگی اپنی اے شکیلؔ اب تک

تلخیٔ رسم و راہ میں گزری

zindagi un ki chah mein guzri

mustaqil dard-o-ah mein guzri

rahmaton se nibah mein guzri

umr sari gunah mein guzri

hae wo zindagi ki ik saat

jo tiri bargah mein guzri

sab ki nazron mein sar buland rahe

jab tak un ki nigah mein guzri

main wo ik rahrau mohabbat hun

jis ki manzil bhi rah mein guzri

ik khushi ham ne dil mein chahi thi

wo bhi gham ki panah mein guzri

zindagi apni ai shakil ab tak

talkhi-e-rasm-o-rah mein guzri