دل کے بہلانے کی تدبیر تو ہے

دل کے بہلانے کی تدبیر تو ہے

تو نہیں ہے تری تصویر تو ہے

ہم سفر چھوڑ گئے مجھ کو تو کیا

ساتھ میرے مری تقدیر تو ہے

قید سے چھوٹ کے بھی کیا پایا

آج بھی پاؤں میں زنجیر تو ہے

کیا مجال ان کی نہ دیں خط کا جواب

بات کچھ باعث تاخیر تو ہے

پرسش حال کو وہ آ ہی گئے

کچھ بھی ہو عشق میں تاثیر تو ہے

غم کی دنیا رہے آباد شکیلؔ

مفلسی میں کوئی جاگیر تو ہے

dil ke bahlane ki tadbir to hai

to nahin hai tiri taswir to hai

ham safar chhor gae mujh ko to kya

sath mere miri taqdir to hai

qaid se chhut ke bhi kya paya

aj bhi paon mein zanjir to hai

kya majal un ki na den khat ka jawab

bat kuchh bais-e-takhir to hai

pursish-e-hal ko wo a hi gae

kuchh bhi ho ishq mein tasir to hai

gham ki duniya rahe abad shakil

muflisi mein koi jagir to hai