جینے والے قضا سے ڈرتے ہیں

جینے والے قضا سے ڈرتے ہیں

زہر پی کر دوا سے ڈرتے ہیں

زاہدوں کو کسی کا خوف نہیں

صرف کالی گھٹا سے ڈرتے ہیں

آپ جو کچھ کہیں ہمیں منظور

نیک بندے خدا سے ڈرتے ہیں

دشمنوں کو ستم کا خوف نہیں

دوستوں کی وفا سے ڈرتے ہیں

عزم و ہمت کے باوجود شکیلؔ

عشق کی ابتدا سے ڈرتے ہیں

jine wale qaza se darte hain

zahr pi kar dawa se darte hain

zahidon ko kisi ka khauf nahin

sirf kali ghata se darte hain

ap jo kuchh kahin hamen manzur

nek bande khuda se darte hain

dushmanon ko sitam ka khauf nahin

doston ki wafa se darte hain

azm-o-himmat ke bawajud shakil

ishq ki ibtida se darte hain