مری زندگی پہ نہ مسکرا مجھے زندگی کا الم نہیں

مری زندگی پہ نہ مسکرا مجھے زندگی کا الم نہیں

جسے تیرے غم سے ہو واسطہ وہ خزاں بہار سے کم نہیں

مرا کفر حاصل زہد ہے مرا زہد حاصل کفر ہے

مری بندگی وہ ہے بندگی جو رہین دیر و حرم نہیں

مجھے راس آئیں خدا کرے یہی اشتباہ کی ساعتیں

انہیں اعتبار وفا تو ہے مجھے اعتبار ستم نہیں

وہی کارواں وہی راستے وہی زندگی وہی مرحلے

مگر اپنے اپنے مقام پر کبھی تم نہیں کبھی ہم نہیں

نہ وہ شان جبر شباب ہے نہ وہ رنگ قہر عتاب ہے

دل بے قرار پہ ان دنوں ہے ستم یہی کہ ستم نہیں

نہ فنا مری نہ بقا مری مجھے اے شکیلؔ نہ ڈھونڈھئے

میں کسی کا حسن خیال ہوں مرا کچھ وجود و عدم نہیں

miri zindagi pe na muskura mujhe zindagi ka alam nahin

jise tere gham se ho wasta wo khizan bahar se kam nahin

mira kufr hasil-e-zohd hai mira zohd hasil-e-kufr hai

miri bandagi wo hai bandagi jo rahin-e-dair-o-haram nahin

mujhe ras aen khuda kare yahi ishtibah ki saaten

unhen etibar-e-wafa to hai mujhe etibar-e-sitam nahin

wahi karwan wahi raste wahi zindagi wahi marhale

magar apne apne maqam par kabhi tum nahin kabhi ham nahin

na wo shan-e-jabr-e-shabab hai na wo rang qahr itab hai

dil-e-be qarar pe in dinon hai sitam yahi ke sitam nahin

na fana miri na baqa miri mujhe ai shakil na dhundhiye

main kisi ka husn-e-khayal hun mira kuchh wajud-o-adam nahin