اب تو خوشی کا غم ہے نہ غم کی خوشی مجھے

اب تو خوشی کا غم ہے نہ غم کی خوشی مجھے

بے حس بنا چکی ہے بہت زندگی مجھے

وہ وقت بھی خدا نہ دکھائے کبھی مجھے

ان کی ندامتوں پہ ہو شرمندگی مجھے

رونے پہ اپنے ان کو بھی افسردہ دیکھ کر

یوں بن رہا ہوں جیسے اب آئی ہنسی مجھے

یوں دیجئے فریب محبت کہ عمر بھر

میں زندگی کو یاد کروں زندگی مجھے

رکھنا ہے تشنہ کام تو ساقی بس اک نظر

سیراب کر نہ دے مری تشنہ لبی مجھے

پایا ہے سب نے دل مگر اس دل کے باوجود

اک شے ملی ہے دل میں کھٹکتی ہوئی مجھے

راضی ہوں یا خفا ہوں وہ جو کچھ بھی ہوں شکیلؔ

ہر حال میں قبول ہے ان کی خوشی مجھے

ab to khushi ka gham hai na gham ki khushi mujhe

be his bana chuki hai bahut zindagi mujhe

wo waqt bhi khuda na dikhae kabhi mujhe

un ki nadamaton pe ho sharmindagi mujhe

rone pe apne un ko bhi afsurda dekh kar

yun ban raha hun jaise ab ai hansi mujhe

yun dijiye fareb-e-mohabbat ke umr bhar

main zindagi ko yad karun zindagi mujhe

rakhna hai tishna kam to saqi bas ik nazar

sairab kar na de miri tishna labi mujhe

paya hai sab ne dil magar is dil ke bawajud

ik shai mili hai dil mein khatakti hui mujhe

razi hun ya khafa hun wo jo kuchh bhi hun shakil

har hal mein qubul hai un ki khushi mujhe