غم عاشقی سے کہہ دو رہ عام تک نہ پہنچے

غم عاشقی سے کہہ دو رہ عام تک نہ پہنچے

مجھے خوف ہے یہ تہمت ترے نام تک نہ پہنچے

میں نظر سے پی رہا تھا تو یہ دل نے بد دعا دی

ترا ہاتھ زندگی بھر کبھی جام تک نہ پہنچے

وہ نوائے مضمحل کیا نہ ہو جس میں دل کی دھڑکن

وہ صدائے اہل دل کیا جو عوام تک نہ پہنچے

مرے طائر نفس کو نہیں باغباں سے رنجش

ملے گھر میں آب و دانہ تو یہ دام تک نہ پہنچے

نئی صبح پر نظر ہے مگر آہ یہ بھی ڈر ہے

یہ سحر بھی رفتہ رفتہ کہیں شام تک نہ پہنچے

یہ ادائے بے نیازی تجھے بے وفا مبارک

مگر ایسی بے رخی کیا کہ سلام تک نہ پہنچے

جو نقاب رخ اٹھا دی تو یہ قید بھی لگا دی

اٹھے ہر نگاہ لیکن کوئی بام تک نہ پہنچے

انہیں اپنے دل کی خبریں مرے دل سے مل رہی ہیں

میں جو ان سے روٹھ جاؤں تو پیام تک نہ پہنچے

وہی اک خموش نغمہ ہے شکیلؔ جان ہستی

جو زبان پر نہ آئے جو کلام تک نہ پہنچے

gham-e-ashiqi se kah do rah-e-am tak na pahunche

mujhe khauf hai ye tohmat tire nam tak na pahunche

main nazar se pi raha tha to ye dil ne bad dua di

tira hath zindagi bhar kabhi jam tak na pahunche

wo nawa-e-muzmahil kya na ho jis mein dil ki dharkan

wo sada-e-ahl-e-dil kya jo awam tak na pahunche

mire tair-e-nafas ko nahin baghban se ranjish

mile ghar mein ab-o-dana to ye dam tak na pahunche

nai subh par nazar hai magar ah ye bhi dar hai

ye sahar bhi rafta rafta kahin sham tak na pahunche

ye adae be niyazi tujhe be wafa mubarak

magar aisi be rukhi kya ke salam tak na pahunche

jo naqab-e-rukh utha di to ye qaid bhi laga di

uthe har nigah lekin koi bam tak na pahunche

unhen apne dil ki khabren mire dil se mil rahi hain

main jo un se ruth jaun to payam tak na pahunche

wahi ik khamosh naghma hai shakil jan-e-hasti

jo zaban par na ae jo kalam tak na pahunche