اے محبت ترے انجام پہ رونا آیا

اے محبت ترے انجام پہ رونا آیا

جانے کیوں آج ترے نام پہ رونا آیا

یوں تو ہر شام امیدوں میں گزر جاتی ہے

آج کچھ بات ہے جو شام پہ رونا آیا

کبھی تقدیر کا ماتم کبھی دنیا کا گلہ

منزل عشق میں ہر گام پہ رونا آیا

مجھ پہ ہی ختم ہوا سلسلۂ نوحہ گری

اس قدر گردش ایام پہ رونا آیا

جب ہوا ذکر زمانے میں محبت کا شکیلؔ

مجھ کو اپنے دل ناکام پہ رونا آیا

ai mohabbat tire anjam pe rona aya

jane kyun aj tire nam pe rona aya

yun to har sham ummidon mein guzar jati hai

aj kuchh bat hai jo sham pe rona aya

kabhi taqdir ka matam kabhi duniya ka gila

manzil-e-ishq mein har gam pe rona aya

mujh pe hi khatm hua silsila-e-nauha giri

is qadar gardish-e-ayyam pe rona aya

jab hua zikr zamane mein mohabbat ka shakil

mujh ko apne dil-e-nakam pe rona aya