زخموں کو رفو کر لیں دل شاد کریں پھر سے

زخموں کو رفو کر لیں دل شاد کریں پھر سے

خوابوں کی کوئی دنیا آباد کریں پھر سے

مدت ہوئی جینے کا احساس نہیں ہوتا

دل ان سے تقاضا کر بیداد کریں پھر سے

مجرم کے کٹہرے میں پھر ہم کو کھڑا کر دو

ہو رسم کہن تازہ فریاد کریں پھر سے

اے اہل جنوں دیکھو زنجیر ہوئے سائے

ہم کیسے انہیں سوچو آزاد کریں پھر سے

اب جی کے بہلنے کی ہے ایک یہی صورت

بیتی ہوئی کچھ باتیں ہم یاد کریں پھر سے

zakhmon ko rafu kar len dil shad karen phir se

khwabon ki koi duniya abad karen phir se

muddat hui jine ka ehsas nahin hota

dil un se taqaza kar bedad karen phir se

mujrim ke katahre mein phir ham ko khara kar do

ho rasm-e-kuhan taza fariyad karen phir se

ai ahl-e-junun dekho zanjir hue sae

ham kaise unhen socho azad karen phir se

ab ji ke bahalne ki hai ek yahi surat

biti hui kuchh baten ham yad karen phir se