طلسم ختم چلو آہ بے اثر کا ہوا

طلسم ختم چلو آہ بے اثر کا ہوا

وہ دیکھو جسم برہنہ ہر اک شجر کا ہوا

سناؤں کیسے کہ سورج کی زد میں ہیں سب لوگ

جو حال رات کو پرچھائیوں کے گھر کا ہوا

صدا کے سائے میں سناٹوں کو پناہ ملی

عجب کہ شہر میں چرچا نہ اس خبر کا ہوا

خلا کی دھند ہی آنکھوں پہ مہربان رہی

حریف کوئی افق کب مری نظر کا ہوا

میں سوچتا ہوں مگر یاد کچھ نہیں آتا

کہ اختتام کہاں خواب کے سفر کا ہوا

tilism-e-khatm chalo ah be asar ka hua

wo dekho jism barahna har ik shajar ka hua

sunaun kaise ke suraj ki zad mein hain sab log

jo hal rat ko parchhaiyon ke ghar ka hua

sada ke sae mein sannaton ko panah mili

ajab ke shahr mein charcha na is khabar ka hua

khala ki dhund hi ankhon pe mehrban rahi

harif koi ufuq kab miri nazar ka hua

main sochta hun magar yad kuchh nahin ata

ke ikhtitam kahan khwab ke safar ka hua