سبھی کو غم ہے سمندر کے خشک ہونے کا

سبھی کو غم ہے سمندر کے خشک ہونے کا

کہ کھیل ختم ہوا کشتیاں ڈبونے کا

برہنہ جسم بگولوں کا قتل ہوتا رہا

خیال بھی نہیں آیا کسی کو رونے کا

صلہ کوئی نہیں پرچھائیوں کی پوجا کا

مآل کچھ نہیں خوابوں کی فصل بونے کا

بچھڑ کے تجھ سے مجھے یہ گمان ہوتا ہے

کہ میری آنکھیں ہیں پتھر کی جسم سونے کا

ہجوم دیکھتا ہوں جب تو کانپ اٹھتا ہوں

اگرچہ خوف نہیں اب کسی کے کھونے کا

گئے تھے لوگ تو دیوار قہقہہ کی طرف

مگر یہ شور مسلسل ہے کیسا رونے کا

مرے وجود پہ نفرت کی گرد جمتی رہی

ملا نہ وقت اسے آنسوؤں سے دھونے کا

sabhi ko gham hai samundar ke khushk hone ka

ke khel khatm hua kashtiyan dubone ka

barahna jism bagulon ka qatl hota raha

khayal bhi nahin aya kisi ko rone ka

sila koi nahin parchhaiyon ki puja ka

maal kuchh nahin khwabon ki fasl bone ka

bichhar ke tujh se mujhe ye guman hota hai

ke meri ankhen hain patthar ki jism sone ka

hujum dekhta hun jab to kanp uthta hun

agarche khauf nahin ab kisi ke khone ka

gae the log to diwar qahqaha ki taraf

magar ye shor-e-musalsal hai kaisa rone ka

mire wajud pe nafrat ki gard jamti rahi

mila na waqt use ansuon se dhone ka