عجیب سانحہ مجھ پر گزر گیا یارو

عجیب سانحہ مجھ پر گزر گیا یارو

میں اپنے سائے سے کل رات ڈر گیا یارو

ہر ایک نقش تمنا کا ہو گیا دھندلا

ہر ایک زخم مرے دل کا بھر گیا یارو

بھٹک رہی تھی جو کشتی وہ غرق آب ہوئی

چڑھا ہوا تھا جو دریا اتر گیا یارو

وہ کون تھا وہ کہاں کا تھا کیا ہوا تھا اسے

سنا ہے آج کوئی شخص مر گیا یارو

میں جس کو لکھنے کے ارمان میں جیا اب تک

ورق ورق وہ فسانہ بکھر گیا یارو

ajib saneha mujh par guzar gaya yaro

main apne sae se kal rat dar gaya yaro

har ek naqsh-e-tamanna ka ho gaya dhundla

har ek zakhm mire dil ka bhar gaya yaro

bhatak rahi thi jo kashti wo gharq-e-ab hui

charha hua tha jo dariya utar gaya yaro

wo kaun tha wo kahan ka tha kya hua tha use

suna hai aj koi shakhs mar gaya yaro

main jis ko likhne ke arman mein jiya ab tak

waraq waraq wo fasana bikhar gaya yaro