Arooz is now on the App Store, for iPhone and iPad. Download →

All poetry

تپش سے بھاگ کر پیاسا گیا ہے

Jagdeesh Raj Figar

تپش سے بھاگ کر پیاسا گیا ہے

سمندر کی طرف صحرا گیا ہے

کنواں موجود ہے جل بھی میسر

وہ میرے گھر سے کیوں تشنہ گیا ہے

دوبارہ روح اس میں پھونک دو تم

بدن جو پھر اکیلا آ گیا ہے

زماں اپنی روش پر تو ہے قائم

مگر لمحات میں فرق آ گیا ہے

سفر میں تازہ دم ہوگا وہ کیسے

جو گھر ہی سے تھکا ماندہ گیا ہے

بنا ہوگا خس و خاشاک سے وہ

جو نبھ جلتا ہوا دیکھا گیا ہے

مجھے لہروں کی کشتی پر بٹھا کر

بھنور کی کھوج میں دریا گیا ہے

زمیں سے بھی توقع کچھ ہے ایسی

دماغ چرخ جب چکرا گیا ہے

جو اترا عرش کا اک ایک طبقہ

زمیں پر دائرہ بنتا گیا ہے

نہ فکر ورطہ تھی اس کو ذرا بھی

وہ کشتی زیست کی کھیتا گیا ہے

فگارؔ اس میں وجود اس کا ملے گا

جو جویاں بحر کا قطرہ گیا ہے