Arooz is now on the App Store, for iPhone and iPad. Download →

All poetry

جو فقط رہتے ہوں دن کو بے قرار

Jagdeesh Raj Figar

جو فقط رہتے ہوں دن کو بے قرار

مہوشوں میں کیجئے ان کا شمار

جس پہ سہواً ہو گیا میرا نزول

ذات اس کی ہو گئی بس آب دار

وہ مری سانسوں کے رستے ہو لیا

جو اٹھا دل سے کبھی گرد و غبار

خالق کونین سے کیا واسطہ

جب مرا کردار ٹھہرا کردگار

دن کو ہوں میں گرم شب کو سرد ہوں

میری ہستی کیا نہیں ہے ریگ زار

کشمکش جاری ہے جو افلاک میں

دیکھیے حاصل ہو کس کو اقتدار

اور بھی تو ہیں یہاں کتنے مقیم

پاؤں دھرتی پر نہ تو اتنے پسار

موت سے کہہ دو نہ اس میں دخل دے

زیست سے ہے ربط میرا استوار

موت کا پہلے ہی پرتو دیکھ لوں

دل کے درپن پر ہے اس کا انحصار

ایک سوکھا کھیت ہے وہ جس جگہ

میں وہاں ہوں آب جو کا رہ گزار

یہ جو عالم ہے کبھی اک دیس تھا

اس سے کٹ کر بن گئے کتنے دیار

خاک ہوں یا موم ہوں کیا امتیاز

شمع محفل ہوں کہ ہوں شمع مزار

حبس کے زندان میں رکھا ہے کیوں

میں تو زندانی نہیں ہوں اے فگارؔ