خاندانی قول کا تو پاس رکھ

خاندانی قول کا تو پاس رکھ

رام ہے تو سامنے بن باس رکھ

آس کے گوہر بھی کچھ مل جائیں گے

یاس کے کچھ پتھروں کو پاس رکھ

تو امارت کے محل کا خواب چھوڑ

خواب میں بس جھونپڑی کا باس رکھ

محض تیری ذات تک محدود کیوں

موسموں کے کیف کا بھی پاس رکھ

دہر میں ماضی بھی تھا تیرا نہ بھول

آنے والے کل میں بھی وشواس رکھ

تجھ کو اپنے غم کا تو احساس ہو

اپنے پہلو میں دل حساس رکھ

دولت افلاس تجھ کو مل گئی

دولت کونین کی اب آس رکھ

مبتدی کو لوح سے ہے واسطہ

تو تو ہے اہل قلم قرطاس رکھ

بوستاں سب کو لگے تیرا وجود

اپنے تن میں اس لئے بو باس رکھ

یہ زماں ہے تیز رو گھوڑا نہیں

ہاتھ میں اپنے نہ اس کی راس رکھ

صاحب مقدور ہے مانا فگارؔ

یہ تجھے کس نے کہا تھا داس رکھ

khandani qaul ka to pas rakh

ram hai to samne ban bas rakh

as ke gauhar bhi kuchh mil jaenge

yas ke kuchh pattharon ko pas rakh

tu amarat ke mahal ka khwab chhor

khwab mein bas jhonpari ka bas rakh

mahz teri zat tak mahdud kyun

mausamon ke kaif ka bhi pas rakh

dahr mein mazi bhi tha tera na bhul

ane wale kal main bhi washwas rakh

tujh ko apne gham ka to ehsas ho

apne pahlu mein dil-e-hassas rakh

daulat-e-iflas tujh ko mil gai

daulat-e-kaunain ki ab as rakh

mubtadi ko lauh se hai wasta

tu to hai ahl-e-qalam qirtas rakh

bostan sab ko lage tera wajud

apne tan mein is liye bu bas rakh

ye zaman hai tez ro ghora nahin

hath main apne na us ki ras rakh

sahab-e-maqdur hai mana figar

ye tujhe kis ne kaha tha das rakh