دل تجھے ناز ہے جس شخص کی دل داری پر

دل تجھے ناز ہے جس شخص کی دل داری پر

دیکھ اب وہ بھی اتر آیا اداکاری پر

میں نے دشمن کو جگایا تو بہت تھا لیکن

احتجاجاً نہیں جاگا مری بیداری پر

آدمی آدمی کو کھائے چلا جاتا ہے

کچھ تو تحقیق کرو اس نئی بیماری پر

کبھی اس جرم پہ سر کاٹ دئے جاتے تھے

اب تو انعام دیا جاتا ہے غداری پر

تیری قربت کا نشہ ٹوٹ رہا ہے مجھ میں

اس قدر سہل نہ ہو تو مری دشواری پر

مجھ میں یوں تازہ ملاقات کے موسم جاگے

آئنہ ہنسنے لگا ہے مری تیاری پر

کوئی دیکھے بھرے بازار کی ویرانی کو

کچھ نہ کچھ مفت ہے ہر شے کی خریداری پر

بس یہی وقت ہے سچ منہ سے نکل جانے دو

لوگ اتر آئے ہیں ظالم کی طرف داری پر

dil tujhe naz hai jis shakhs ki dil dari par

dekh ab wo bhi utar aya adakari par

main ne dushman ko jagaya to bahut tha lekin

ehtijajan nahin jaga miri bedari par

admi admi ko khae chala jata hai

kuchh to tahqiq karo is nai bimari par

kabhi is jurm pe sar kat diye jate the

ab to inam diya jata hai ghaddari par

teri qurbat ka nasha tut raha hai mujh mein

is qadar sahl na ho to miri dushwari par

mujh mein yun taza mulaqat ke mausam jage

aina hansne laga hai miri tayyari par

koi dekhe bhare bazar ki wirani ko

kuchh na kuchh muft hai har shai ki kharidari par

bas yahi waqt hai sach munh se nikal jane do

log utar ae hain zalim ki taraf dari par