کبھی ستارے کبھی کہکشاں بلاتا ہے

کبھی ستارے کبھی کہکشاں بلاتا ہے

ہمیں وہ بزم میں اپنی کہاں بلاتا ہے

نہ جانے کون سی افتاد آ پڑی ہے کہ جو

ہم اہل عشق کو کار جہاں بلاتا ہے

یہ کیسا دام رہائی بچھا دیا اس نے

زمیں پکڑتی ہے اور آسماں بلاتا ہے

گلی گلی میں عقیدوں بھری دکانیں ہیں

قدم قدم پہ نیا آستاں بلاتا ہے

بھٹک گئے ہیں مگر گم نہیں ہوئے ہیں کہیں

ابھی ہمیں جرس کارواں بلاتا ہے

یہ آگ لگنے سے پہلے کی بازگشت ہے جو

بجھانے والوں کو اب تک دھواں بلاتا ہے

امید ٹوٹنے لگتی ہے جب بھی کوئی سلیمؔ

تو اک یقیں پس وہم و گماں بلاتا ہے

kabhi sitare kabhi kahkashan bulata hai

hamen wo bazm main apni kahan bulata hai

na jane kaun si uftad a pari hai ke jo

ham ahl ishq ko kar-e-jahan bulata hai

ye kaisa dam rihai bichha diya us ne

zamin pakarti hai aur asman bulata hai

gali gali mein aqidon bhari dukanen hain

qadam qadam pe naya astan bulata hai

bhatak gae hain magar gum nahin hue hain kahin

abhi hamen jaras-e-karwan bulata hai

ye ag lagne se pahle ki bazgasht hai jo

bujhane walon ko ab tak dhuan bulata hai

umid tutne lagti hai jab bhi koi salim

to ik yaqin pas wahm-o-guman bulata hai