ابھی جو گردش ایام سے ملا ہوں میں

ابھی جو گردش ایام سے ملا ہوں میں

سمجھ رہی تھی کسی کام سے ملا ہوں میں

شکست شب تری تقریب سے ذرا پہلے

دیے جلاتی ہوئی شام سے ملا ہوں میں

اجل سے پہلے بھی ملتا رہا ہوں پر اب کے

بڑے سکوں بڑے آرام سے ملا ہوں میں

تری قبا کی مہک ہر طرف نمایاں تھی

ہوائے وادئ گل فام سے ملا ہوں میں

میں جانتا ہوں مکینوں کی خامشی کا سبب

مکاں سے پہلے در و بام سے ملا ہوں میں

سلیمؔ نام بتایا تھا غالباً اس نے

کل ایک شاعر گمنام سے ملا ہوں میں

abhi jo gardish-e-ayyam se mila hun main

samajh rahi thi kisi kam se mila hun main

shikast-e-shab tiri taqrib se zara pahle

diye jalati hui sham se mila hun main

ajal se pahle bhi milta raha hun par ab ke

bare sukun bare aram se mila hun main

tiri qaba ki mahak har taraf numayan thi

hawa-e-wadi-e-gul fam se mila hun main

main janta hun makinon ki khamushi ka sabab

makan se pahle dar-o-bam se mila hun main

salim nam bataya tha ghaliban us ne

kal ek shayar gumnam se mila hun main