تارے جو کبھی اشک فشانی سے نکلتے

تارے جو کبھی اشک فشانی سے نکلتے

ہم چاند اٹھائے ہوئے پانی سے نکلتے

خاموش سہی مرکزی کردار تو ہم تھے

پھر کیسے بھلا تیری کہانی سے نکلتے

مہلت ہی نہ دی گردش افلاک نے ہم کو

کیا سلسلۂ نقل مکانی سے نکلتے

اک عمر لگی تیری کشادہ نظری میں

اس تنگئ داماں کو گرانی سے نکلتے

بس ایک ہی موسم کا تسلسل ہے یہ دنیا

کیا ہجر زدہ خواب جوانی سے نکلتے

وہ وقت بھی گزرا ہے کہ دیکھا نہیں تم نے

صحراؤں کو دریا کی روانی سے نکلتے

شاید کہ سلیمؔ امن کی صورت نظر آتی

ہم لوگ اگر شعلہ بیانی سے نکلتے

tare jo kabhi ashk fishani se nikalte

ham chand uthae hue pani se nikalte

khamosh sahi markazi kirdar to ham the

phir kaise bhala teri kahani se nikalte

mohlat hi na di gardish-e-aflak ne ham ko

kya silsila-e-naql-e-makani se nikalte

ik umr lagi teri kushada nazari mein

is tangi-e-daman ko girani se nikalte

bas ek hi mausam ka tasalsul hai ye duniya

kya hijr zada khwab-e-jawani se nikalte

wo waqt bhi guzra hai ke dekha nahin tum ne

sahraon ko dariya ki rawani se nikalte

shayad ke salim amn ki surat nazar ati

ham log agar shola bayani se nikalte