خوشی کا ایک لمحہ چاہئے تھا

خوشی کا ایک لمحہ چاہئے تھا

گھڑی بھر ساتھ تیرا چاہئے تھا

ملا تھا میں مہینوں بعد تم سے

تمہیں سینے سے لگنا چاہئے تھا

میں دنیا گھومنے بے کار نکلا

تری آنکھوں کو تکنا چاہئے تھا

ہمیشہ ہم نے کی تیری تمنا

ہمیں کب تیرے جیسا چاہئے تھا

تجھے سونپا تھا اپنا آپ میں نے

تو پھر محفوظ رکھنا چاہئے تھا

اسے احوال بتلانا ہے اپنا

کوئی زخمی پرندہ چاہئے تھا

تمہارے عشق نے مارا ہے جس کو

مجھے وہ شخص زندہ چاہئے تھا

دغا کر کے بھی کتنے مطمئن ہو

تمہیں تو ڈوب مرنا چاہئے تھا

اسے بخشا گیا پھر ہجر جس کو

جوانی میں بڑھاپا چاہئے تھا

سبھی اچھے ہوں کب چاہا تھا میں نے

مجھے اک دوست اچھا چاہئے تھا

پھنسے ہیں اب وہی مشکل ڈگر میں

جنہیں آسان رستہ چاہئے تھا

کوئی بیوہ کے دکھ کو کیا سمجھتا

سبھوں کو گھر میں حصہ چاہئے تھا

میں سمجھا وہ مری خاطر کھڑی ہے

مگر اس کو تو رکشا چاہئے تھا

khushi ka ek lamha chahiye tha

ghari bhar sath tera chahiye tha

mila tha main mahinon baad tum se

tumhen sine se lagna chahiye tha

main duniya ghumne be kar nikla

tiri ankhon ko takna chahiye tha

hamesha ham ne ki teri tamanna

hamen kab tere jaisa chahiye tha

tujhe saunpa tha apna ap main ne

to phir mahfuz rakhna chahiye tha

use ahwal batlana hai apna

koi zakhmi parinda chahiye tha

tumhare ishq ne mara hai jis ko

mujhe wo shakhs zinda chahiye tha

dagha kar ke bhi kitne mutmain ho

tumhen to dub marna chahiye tha

use bakhsha gaya phir hijr jis ko

jawani mein burhapa chahiye tha

sabhi achchhe hun kab chaha tha main ne

mujhe ik dost achchha chahiye tha

phanse hain ab wahi mushkil dagar mein

jinhen asan rasta chahiye tha

koi bewa ke dukh ko kya samajhta

sabhon ko ghar mein hissa chahiye tha

main samjha wo miri khatir khari hai

magar us ko to raksha chahiye tha