ڈوبنے والے بھی تنہا تھے تنہا دیکھنے والے تھے

ڈوبنے والے بھی تنہا تھے تنہا دیکھنے والے تھے

جیسے اب کے چڑھے ہوئے تھے دریا دیکھنے والے تھے

آج تو شام ہی سے آنکھوں میں نیند نے خیمے گاڑ دیئے

ہم تو دن نکلے تک تیرا رستہ دیکھنے والے تھے

اک دستک کی رم جھم نے اندیشوں کے در کھول دیئے

رات اگر ہم سو جاتے تو سپنا دیکھنے والے تھے

ایک سوار کی سج دھج کو رستوں کی وحشت نگل گئی

ورنہ اس تہوار پہ ہم بھی میلہ دیکھنے والے تھے

میں نے جس صف کو چھوڑا ہے اس میں شامل سارے لوگ

اپنے قد کو بھول کے اپنا سایا دیکھنے والے تھے

میں پانی اور آگ سے اک مٹی کی خاطر لوٹا تھا

اور یہ دونوں عالم کھیل تماشا دیکھنے والے تھے

اب آئینہ حیرت سے اک اک کا منہ تکتا ہے سلیمؔ

پہلے لوگ تو آئینے میں چہرہ دیکھنے والے تھے

dubne wale bhi tanha the tanha dekhne wale the

jaise ab ke charhe hue the dariya dekhne wale the

aj to sham hi se ankhon mein nind ne kheme gar diye

ham to din nikle tak tera rasta dekhne wale the

ik dastak ki ram jhim ne andeshon ke dar khol diye

rat agar ham so jate to sapna dekhne wale the

ek sawar ki saj dhaj ko raston ki wahshat nigal gai

warna is tahwar pe ham bhi mela dekhne wale the

main ne jis saf ko chhora hai is mein shamil sare log

apne qad ko bhul ke apna saya dekhne wale the

main pani aur ag se ik mitti ki khatir lauta tha

aur ye donon alam khel tamasha dekhne wale the

ab aina hairat se ik ik ka munh takta hai salim

pahle log to aine mein chehra dekhne wale the