ملاقاتوں کا ایسا سلسلہ رکھا ہے تم نے

ملاقاتوں کا ایسا سلسلہ رکھا ہے تم نے

بدن کیا روح میں بھی رت جگا رکھا ہے تم نے

کوئی آساں نہیں تھا زندگی سے کٹ کے جینا

بہت مشکل دنوں میں رابطہ رکھا ہے تم نے

ہم ایسے ملنے والوں کو کہاں اس کی خبر تھی

نہ ملنے کا بھی کوئی راستہ رکھا ہے تم نے

جنوں کی حالتوں کا ہم کو اندازہ نہیں تھا

دیے کہ شہ پہ سورج کو بجھا رکھا ہے تم نے

ہوا کو حبس کرنا ہو تو کوئی تم سے سیکھے

دریچے بند دروازہ کھلا رکھا ہے تم نے

اب ایسا ہے کہ دنیا سے الجھتے پھر رہے ہیں

عجب کیفتیوں میں مبتلا رکھا ہے تم نے

خزاں جیسے ہرے پیڑوں کو رسوا کر رہی ہے

سلوک ایسا ہی کچھ ہم سے روا رکھا ہے تم نے

رہائی کے لیے زنجیر پہنائی گئی تھی

اسیری کے لیے پہرا اٹھا رکھا ہے تم نے

بریدہ عکس لرزاں ہیں لہو کی وحشتوں میں

یہ کیسا آئینہ خانہ سجا رکھا ہے تم نے

جہاں کردار گونگے دیکھنے والے ہیں اندھے

اسی منظر سے تو پردہ ہٹا رکھا ہے تم نے

محبت کرنے والے اب کہاں جا کر ملیں گے

گزر گاہوں کو تو مقتل بنا رکھا ہے تم نے

mulaqaton ka aisa silsila rakha hai tum ne

badan kya ruh mein bhi rut jaga rakha hai tum ne

koi asan nahin tha zindagi se kat ke jina

bahut mushkil dinon mein rabta rakha hai tum ne

ham aise milne walon ko kahan us ki khabar thi

na milne ka bhi koi rasta rakha hai tum ne

junun ki halaton ka ham ko andaza nahin tha

diye ke shah pe suraj ko bujha rakha hai tum ne

hawa ko habs karna ho to koi tum se sikhe

dariche band darwaza khula rakha hai tum ne

ab aisa hai ke duniya se ulajhte phir rahe hain

ajab kaiftiyon mein mubtala rakha hai tum ne

khizan jaise hare peron ko ruswa kar rahi hai

suluk aisa hi kuchh ham se rawa rakha hai tum ne

rihai ke liye zanjir pahnai gai thi

asiri ke liye pahra utha rakha hai tum ne

burida aks larzan hain lahu ki wahshaton mein

ye kaisa aina khana saja rakha hai tum ne

jahan kirdar gunge dekhne wale hain andhe

isi manzar se to parda hata rakha hai tum ne

mohabbat karne wale ab kahan ja kar milenge

guzar gahon ko to maqtal bana rakha hai tum ne