اجنبی حیران مت ہونا کہ در کھلتا نہیں

اجنبی حیران مت ہونا کہ در کھلتا نہیں

جو یہاں آباد ہیں ان پر بھی گھر کھلتا نہیں

راستے کب گرد ہو جاتے ہیں اور منزل سراب

ہر مسافر پر طلسم رہ گزر کھلتا نہیں

دیکھنے والے تغافل کار فرما ہے ابھی

وہ دریچہ کھل گیا حسن نظر کھلتا نہیں

جانے کیوں تیری طرف سے دل کو دھڑکا ہی رہا

اس تکلف سے تو کوئی نامہ بر کھلتا نہیں

انتظار اور دستکوں کے درمیاں کٹتی ہے عمر

اتنی آسانی سے تو باب ہنر کھلتا نہیں

ہم بھی اس کے ساتھ گردش میں ہیں برسوں سے سلیمؔ

جو ستارہ ساتھ رہتا ہے مگر کھلتا نہیں

ajnabi hairan mat hona ke dar khulta nahin

jo yahan abad hain un par bhi ghar khulta nahin

raste kab gard ho jate hain aur manzil sarab

har musafir par tilism-e-rah guzar khulta nahin

dekhne wale taghaful kar farma hai abhi

wo daricha khul gaya husn-e-nazar khulta nahin

jane kyun teri taraf se dil ko dharka hi raha

is takalluf se to koi nama bar khulta nahin

intizar aur dastakon ke darmiyan katti hai umr

itni asani se to bab-e-hunar khulta nahin

ham bhi us ke sath gardish mein hain barson se salim

jo sitara sath rahta hai magar khulta nahin