کہیں تم اپنی قسمت کا لکھا تبدیل کر لیتے

کہیں تم اپنی قسمت کا لکھا تبدیل کر لیتے

تو شاید ہم بھی اپنا راستہ تبدیل کر لیتے

اگر ہم واقعی کم حوصلہ ہوتے محبت میں

مرض بڑھنے سے پہلے ہی دوا تبدیل کر لیتے

تمہارے ساتھ چلنے پر جو دل راضی نہیں ہوتا

بہت پہلے ہم اپنا فیصلہ تبدیل کر لیتے

تمہیں ان موسموں کی کیا خبر ملتی اگر ہم بھی

گھٹن کے خوف سے آب و ہوا تبدیل کر لیتے

تمہاری طرح جینے کا ہنر آتا تو پھر شاید

مکان اپنا وہی رکھتے پتا تبدیل کر لیتے

وہی کردار ہیں تازہ کہانی میں جو پہلے بھی

کبھی چہرہ کبھی اپنی قبا تبدیل کر لیتے

جدائی بھی نہ ہوتی زندگی بھی سہل ہو جاتی

جو ہم اک دوسرے سے مسئلہ تبدیل کر لیتے

ہمیشہ کی طرح اس بار بھی ہم بول اٹھے ورنہ

گواہی دینے والے واقعہ تبدیل کر لیتے

بہت دھندلا گیا یادوں کی رم جھم میں دل سادہ

وہ مل جاتا تو ہم یہ آئینہ تبدیل کر لیتے

kahin tum apni qismat ka likha tabdil kar lete

to shayad ham bhi apna rasta tabdil kar lete

agar ham waqai kam hausla hote mohabbat mein

maraz barhne se pahle hi dawa tabdil kar lete

tumhare sath chalne par jo dil razi nahin hota

bahut pahle ham apna faisla tabdil kar lete

tumhen in mausamon ki kya khabar milti agar ham bhi

ghutan ke khauf se ab-o-hawa tabdil kar lete

tumhari tarah jine ka hunar ata to phir shayad

makan apna wahi rakhte pata tabdil kar lete

wahi kirdar hain taza kahani mein jo pahle bhi

kabhi chehra kabhi apni qaba tabdil kar lete

judai bhi na hoti zindagi bhi sahl ho jati

jo ham ik dusre se masala tabdil kar lete

hamesha ki tarah is bar bhi ham bol uthe warna

gawahi dene wale waqia tabdil kar lete

bahut dhundla gaya yadon ki ram jhim mein dil-e-sada

wo mil jata to ham ye aina tabdil kar lete