یہ لوگ جس سے اب انکار کرنا چاہتے ہیں

یہ لوگ جس سے اب انکار کرنا چاہتے ہیں

وہ گفتگو در و دیوار کرنا چاہتے ہیں

ہمیں خبر ہے کہ گزرے گا ایک سیل فنا

سو ہم تمہیں بھی خبردار کرنا چاہتے ہیں

اور اس سے پہلے کہ ثابت ہو جرم خاموشی

ہم اپنی رائے کا اظہار کرنا چاہتے ہیں

یہاں تک آ تو گئے آپ کی محبت میں

اب اور کتنا گنہ گار کرنا چاہتے ہیں

گل امید فروزاں رہے تری خوشبو

کہ لوگ اسے بھی گرفتار کرنا چاہتے ہیں

اٹھائے پھرتے ہیں کب سے عذاب در بدری

اب اس کو وقف رہ یار کرنا چاہتے ہیں

جہاں کہانی میں قاتل بری ہوا ہے وہاں

ہم اک گواہ کا کردار کرنا چاہتے ہیں

وہ ہم ہیں جو تری آواز سن کے تیرے ہوئے

وہ اور ہیں کہ جو دیدار کرنا چاہتے ہیں

ye log jis se ab inkar karna chahte hain

wo guftugu dar-o-diwar karna chahte hain

hamen khabar hai ke guzrega ek sail-e-fana

so ham tumhen bhi khabardar karna chahte hain

aur is se pahle ke sabit ho jurm-e-khamoshi

ham apni rae ka izhar karna chahte hain

yahan tak a to gae ap ki mohabbat mein

ab aur kitna gunah gar karna chahte hain

gul-e-umid farozan rahe tiri khushbu

ke log use bhi giraftar karna chahte hain

uthae phirte hain kab se azab dar badri

ab us ko waqf-e-rah yar karna chahte hain

jahan kahani mein qatil buri hua hai wahan

ham ik gawah ka kirdar karna chahte hain

wo ham hain jo tiri awaz sun ke tere hue

wo aur hain ke jo didar karna chahte hain