کہانی لکھتے ہوئے داستاں سناتے ہوئے

کہانی لکھتے ہوئے داستاں سناتے ہوئے

وہ سو گیا ہے مجھے خواب سے جگاتے ہوئے

دیے کی لو سے چھلکتا ہے اس کے حسن کا عکس

سنگار کرتے ہوئے آئینہ سجاتے ہوئے

اب اس جگہ سے کئی راستے نکلتے ہیں

میں گم ہوا تھا جہاں راستہ بتاتے ہوئے

پکارتے ہیں انہیں ساحلوں کے سناٹے

جو لوگ ڈوب گئے کشتیاں بناتے ہوئے

پھر اس نے مجھ سے کسی بات کو چھپایا نہیں

وہ کھل گیا تھا کسی بات کو چھپاتے ہوئے

مجھی میں تھا وہ ستارہ صفت کہ جس کے لیے

میں تھک گیا ہوں زمانے کی خاک اڑاتے ہوئے

مزاروں اور منڈیروں کے رت جگوں میں سلیمؔ

بدن پگھلنے لگے ہیں دیے جلاتے ہوئے

kahani likhte hue dastan sunate hue

wo so gaya hai mujhe khwab se jagate hue

diye ki lau se chhalakta hai us ke husn ka aks

singar karte hue aina sajate hue

ab is jagah se kai raste nikalte hain

main gum hua tha jahan rasta batate hue

pukarte hain unhen sahilon ke sannate

jo log dub gae kashtiyan banate hue

phir us ne mujh se kisi bat ko chhupaya nahin

wo khul gaya tha kisi bat ko chhupate hue

mujhi mein tha wo sitara sifat ke jis ke liye

main thak gaya hun zamane ki khak urate hue

mazaron aur munderon ke rut jagon mein salim

badan pighalne lage hain diye jalate hue