کچھ بھی تھا سچ کے طرف دار ہوا کرتے تھے

کچھ بھی تھا سچ کے طرف دار ہوا کرتے تھے

تم کبھی صاحب کردار ہوا کرتے تھے

سنتے ہیں ایسا زمانہ بھی یہاں گزرا ہے

حق انہیں ملتا جو حق دار ہوا کرتے تھے

تجھ کو بھی زعم سا رہتا تھا مسیحائی کا

اور ہم بھی ترے بیمار ہوا کرتے تھے

اک نظر روز کہیں جال بچھائے رکھتی

اور ہم روز گرفتار ہوا کرتے تھے

ہم کو معلوم تھا آنا تو نہیں تجھ کو مگر

تیرے آنے کے تو آثار ہوا کرتے تھے

عشق کرتے تھے فقط پاس وفا رکھنے کو

لوگ سچ مچ کے وفادار ہوا کرتے تھے

آئینہ خود بھی سنورتا تھا ہماری خاطر

ہم ترے واسطے تیار ہوا کرتے تھے

ہم گل خواب سجاتے تھے دکان دل میں

اور پھر خود ہی خریدار ہوا کرتے تھے

کوچۂ میرؔ کی جانب نکل آتے تھے سبھی

وہ جو غالبؔ کے طرف دار ہوا کرتے تھے

جن سے آوارگئ شب کا بھرم تھا وہ لوگ

اس بھرے شہر میں دو چار ہوا کرتے تھے

یہ جو زنداں میں تمہیں سائے نظر آتے ہیں

یہ کبھی رونق دربار ہوا کرتے تھے

میں سر دشت وفا اب ہوں اکیلا ورنہ

میرے ہم راہ مرے یار ہوا کرتے تھے

وقت رک رک کے جنہیں دیکھتا رہتا ہے سلیمؔ

یہ کبھی وقت کی رفتار ہوا کرتے تھے

kuchh bhi tha sach ke taraf dar hua karte the

tum kabhi sahab-e-kirdar hua karte the

sunte hain aisa zamana bhi yahan guzra hai

haq unhen milta jo haq dar hua karte the

tujh ko bhi zaam sa rahta tha masihai ka

aur ham bhi tire bimar hua karte the

ik nazar roz kahin jal bichhae rakhti

aur ham roz giraftar hua karte the

ham ko maalum tha ana to nahin tujh ko magar

tere ane ke to asar hua karte the

ishq karte the faqat pas-e-wafa rakhne ko

log sach much ke wafadar hua karte the

aina khud bhi sanwarta tha hamari khatir

ham tire waste tayyar hua karte the

ham gul-e-khwab sajate the dukan-e-dil mein

aur phir khud hi kharidar hua karte the

kucha-e-mir ki janib nikal ate the sabhi

wo jo ghalib ke taraf dar hua karte the

jin se awargi-e-shab ka bharam tha wo log

is bhare shahr mein do char hua karte the

ye jo zindan mein tumhen sae nazar ate hain

ye kabhi raunaq-e-darbar hua karte the

main sar-e-dasht-e-wafa ab hun akela warna

mere ham rah mire yar hua karte the

waqt ruk ruk ke jinhen dekhta rahta hai salim

ye kabhi waqt ki raftar hua karte the