قربتیں ہوتے ہوئے بھی فاصلوں میں قید ہیں

قربتیں ہوتے ہوئے بھی فاصلوں میں قید ہیں

کتنی آزادی سے ہم اپنی حدوں میں قید ہیں

کون سی آنکھوں میں میرے خواب روشن ہیں ابھی

کس کی نیندیں ہیں جو میرے رتجگوں میں قید ہیں

شہر آبادی سے خالی ہو گئے خوشبو سے پھول

اور کتنی خواہشیں ہیں جو دلوں میں قید ہیں

پاؤں میں رشتوں کی زنجیریں ہیں دل میں خوف کی

ایسا لگتا ہے کہ ہم اپنے گھروں میں قید ہیں

یہ زمیں یوں ہی سکڑتی جائے گی اور ایک دن

پھیل جائیں گے جو طوفاں ساحلوں میں قید ہیں

اس جزیرے پر ازل سے خاک اڑتی ہے ہوا

منزلوں کے بھید پھر بھی راستوں میں قید ہیں

کون یہ پاتال سے ابھرا کنارے پر سلیمؔ

سر پھری موجیں ابھی تک دائروں میں قید ہیں

qurbaten hote hue bhi faslon mein qaid hain

kitni azadi se ham apni hadon mein qaid hain

kaun si ankhon mein mere khwab raushan hain abhi

kis ki ninden hain jo mere ratjagon mein qaid hain

shahr abadi se khali ho gae khushbu se phul

aur kitni khwahishen hain jo dilon mein qaid hain

paon mein rishton ki zanjiren hain dil mein khauf ki

aisa lagta hai ke ham apne gharon mein qaid hain

ye zamin yun hi sukarti jaegi aur ek din

phail jaenge jo tufan sahilon mein qaid hain

is jazire par azal se khak urti hai hawa

manzilon ke bhed phir bhi raston mein qaid hain

kaun ye patal se ubhra kinare par salim

sar phiri maujen abhi tak dairon mein qaid hain