طرب زاروں پہ کیا بیتی صنم خانوں پہ کیا گزری

طرب زاروں پہ کیا بیتی صنم خانوں پہ کیا گزری

دل زندہ ترے مرحوم ارمانوں پہ کیا گزری

زمیں نے خون اگلا آسماں نے آگ برسائی

جب انسانوں کے دل بدلے تو انسانوں پہ کیا گزری

ہمیں یہ فکر ان کی انجمن کس حال میں ہوگی

انہیں یہ غم کہ ان سے چھٹ کے دیوانوں پہ کیا گزری

مرا الحاد تو خیر ایک لعنت تھا سو ہے اب تک

مگر اس عالم وحشت میں ایمانوں پہ کیا گزری

یہ منظر کون سا منظر ہے پہچانا نہیں جاتا

سیہ خانوں سے کچھ پوچھو شبستانوں پہ کیا گزری

چلو وہ کفر کے گھر سے سلامت آ گئے لیکن

خدا کی مملکت میں سوختہ جانوں پہ کیا گزری

tarab zaron pe kya biti sanam khanon pe kya guzri

dil-e-zinda tire marhum armanon pe kya guzri

zamin ne khun agla asman ne ag barsai

jab insanon ke dil badle to insanon pe kya guzri

hamen ye fikr un ki anjuman kis hal mein hogi

unhen ye gham ke un se chhut ke diwanon pe kya guzri

mira ilhad to khair ek laanat tha so hai ab tak

magar is alam-e-wahshat mein imanon pe kya guzri

ye manzar kaun sa manzar hai pahchana nahin jata

siyah khanon se kuchh puchho shabistanon pe kya guzri

chalo wo kufr ke ghar se salamat a gae lekin

khuda ki mamlukat mein sokhta janon pe kya guzri