خودداریوں کے خون کو ارزاں نہ کر سکے

خودداریوں کے خون کو ارزاں نہ کر سکے

ہم اپنے جوہروں کو نمایاں نہ کر سکے

ہو کر خراب مے ترے غم تو بھلا دیے

لیکن غم حیات کا درماں نہ کر سکے

ٹوٹا طلسم عہد محبت کچھ اس طرح

پھر آرزو کی شمع فروزاں نہ کر سکے

ہر شے قریب آ کے کشش اپنی کھو گئی

وہ بھی علاج شوق گریزاں نہ کر سکے

کس درجہ دل شکن تھے محبت کے حادثے

ہم زندگی میں پھر کوئی ارماں نہ کر سکے

مایوسیوں نے چھین لیے دل کے ولولے

وہ بھی نشاط روح کا ساماں نہ کر سکے

khuddariyon ke khun ko arzan na kar sake

ham apne jauhraun ko numayan na kar sake

ho kar kharab mai tire gham to bhala diye

lekin gham-e-hayat ka darman na kar sake

tuta tilism-e-ahd-e-mohabbat kuchh is tarah

phir arzu ki shama farozan na kar sake

har shai qarib a ke kashish apni kho gai

wo bhi ilaj-e-shauq gurezan na kar sake

kis darja dil shikan the mohabbat ke hadse

ham zindagi mein phir koi arman na kar sake

mayusiyon ne chhin liye dil ke walwale

wo bhi nishat-e-ruh ka saman na kar sake