جب کبھی ان کی توجہ میں کمی پائی گئی

جب کبھی ان کی توجہ میں کمی پائی گئی

از سر نو داستان شوق دہرائی گئی

بک گئے جب تیرے لب پھر تجھ کو کیا شکوہ اگر

زندگانی بادہ و ساغر سے بہلائی گئی

اے غم دنیا تجھے کیا علم تیرے واسطے

کن بہانوں سے طبیعت راہ پر لائی گئی

ہم کریں ترک وفا اچھا چلو یوں ہی سہی

اور اگر ترک وفا سے بھی نہ رسوائی گئی

کیسے کیسے چشم و عارض گرد غم سے بجھ گئے

کیسے کیسے پیکروں کی شان زیبائی گئی

دل کی دھڑکن میں توازن آ چلا ہے خیر ہو

میری نظریں بجھ گئیں یا تیری رعنائی گئی

ان کا غم ان کا تصور ان کے شکوے اب کہاں

اب تو یہ باتیں بھی اے دل ہو گئیں آئی گئی

جرأت انساں پہ گو تادیب کے پہرے رہے

فطرت انساں کو کب زنجیر پہنائی گئی

عرصۂ ہستی میں اب تیشہ زنوں کا دور ہے

رسم چنگیزی اٹھی توقیر دارائی گئی

jab kabhi un ki tawajjoh mein kami pai gai

az sar-e-nau dastan-e-shauq dohrai gai

bik gae jab tere lab phir tujh ko kya shikwa agar

zindagani bada-o-saghar se bahlai gai

ai gham-e-duniya tujhe kya ilm tere waste

kin bahanon se tabiat rah par lai gai

ham karen tark-e-wafa achchha chalo yun hi sahi

aur agar tark-e-wafa se bhi na ruswai gai

kaise kaise chashm-o-ariz gard-e-gham se bujh gae

kaise kaise paikaron ki shan zebai gai

dil ki dharkan mein tawazun a chala hai khair ho

meri nazren bujh gain ya teri raanai gai

un ka gham un ka tasawwur un ke shikwe ab kahan

ab to ye baten bhi ai dil ho gain ai gai

jurat-e-insan pe go tadib ke pahre rahe

fitrat-e-insan ko kab zanjir pahnai gai

arsa-e-hasti mein ab tesha zanon ka daur hai

rasm-e-changezi uthi tauqir darai gai